September 06,20 10 20,13

የአማራ ክልል እና የደቡብ ወሎ ዞን ከፍተኛ የስራ ሀላፊዎች በግንባታ ላይ የሚገኙ ትምህርት ቤቶችን ጎበኙ፡፡

#

በቀዳማዊት እመቤት ጽ/ቤት በአልብኮ ወረዳ ጦሳ ፈላና የተገነባው ዘመናዊ 2ኛ ደረጃ ትምህርት ቤትን ጨምሮ በ11 ወረዳዎች በግንባታ ላይ የሚገኙ ትምህርት ቤቶች በጉብኝቱ ተካተዋል፡፡
የደቡብ ወሎ ዞን ትምህርት መምሪያ ሀላፊ አቶ ጀማል አበጋዝ በኮቪድ-19 ወረርሺኝ ምክንያት መማር ማስተማሩ መቋረጡን እንደ ምቹ አጋጣሚ በመጠቀም ትምህርት ቤቶች ያለባቸውን የገፅታ ችግር ለመቅረፍ ሰፊ ስራ እየተሰራ ነው ብለዋል፡፡
በዚህም በህብረተሰቡ ተሳትፎ፣በሴፍቲኔት በአልማና እና በመደበኛ ካፒታል በጀት በበርካታ ወረዳዎች በግንባታ ላይ ያሉ የ2ኛ ደረጃ እና የ1ኛ ደረጃ ትምህርት ቤቶች ያሉባቸውን ችግሮች በመለየት ያልተጠናቀቁትን ለማጠናቀቅ እና አዲስ የሚሰሩትን ደግሞ ለማስጀመር እና የመማር ማስተማሩ ስራ ሲጀምር አገልግሎት መስጠት የሚችሉበትን ሁኔታ ለመፍጠር ዓላማ ያደረገ ጉብኝት መሆኑንም ነው መምሪያ ሀላፊው ያስረዱት፡፡
በአልብኮ ወረዳ በ20 ሚሊዮን ብር በቀዳማዊ እመቤት ዝናሽ ታያቸው በጥራትና በአጭር ጊዜ ተገንብቶ በመጠናቀቁ በወሎ ህዝብ ስም ያመሰገኑት መምሪያ ሀላፊው ከወረዳዎች እና ከክልል ጋር በመነጋገር መምህራንን ጨምሮ የሰው ሀይል እና ልዩ ልዩ የትምህርት ግብአቶችን ለማሟላትም ጥረት እየተደረገ መሆኑን ገልፀዋል፡፡
የአማራ ክልል ትምህርት ቢሮ ምክትል ሀላፊ አቶ ተፈራ ፈይሳ በበኩላቸው በአልብኮ ወረዳ የተገነባውን ጨምሮ በአማራ ክልል አራት ትምህርት ቤቶችን ቀዳማዊት እመቤት ዝናሽ ታያቸው በማስገንባታቸው አመስግነዋል፡፡
ትምህርት ቢሮው ፈርኒቸሮችን የማሟላት ስራ በሂደት ላይ መሆኑን በመግለፅ ሌሎች ክልሉ ማድረግ ያለበትንም እንደሚያደርግ ገልፀዋል ምክትል ቢሮ ሀላፊው፡፡
ምክትል ቢሮ ሀላፊው እንዳሉት ዋናው የሂደትና የውጤት በመሆኑ ብቃት ያላቸውን ተማሪዎች ለማፍራት የአካባቢው አመራር፣ወላጆች፣መምህራን እና ተማሪዎች ሀላፊነታቸውን በአግባቡ ለመወጣት መዘጋጀት ይኖርባችዋል፡፡
በቀዳማዊት እመቤት ዝናሽ ታያቸው የተገነባው ትምህርት ቤት እጅግ የኮራንበትና ለወሎ እንደ ትልቅ ስጦታ አድርገን የምንወስደው ነው ያሉት ደግሞ የደቡብ ወሎ ዞን ዋና አስተዳዳሪ አቶ ሰይድ መሀመድ ናቸው፡፡
ከለውጥ ማግስት የተለወጠ አመራር ያለውን ያህል የተለወጠ ውጤት ምን አሳያችሁ ብሎ ለሚጠይቀው ህዝብ አንድ ብቁ ማሳያ ተደርጎ ይወሰዳልም ነው ያሉት ዋና አስተዳዳሪው፡፡
ለውጡን በተግባርና በውጤት ላሳዩት ለቀዳማዊት እመቤት ዝናሽ ታያቸው በወሎ ህዝብና በደቡብ ወሎ ዞን አስተዳደር ስም ላቅ ያለ ምስጋናቸውን አቅርበዋል አቶ ሰይድ መሀመድ፡፡